साउन १६ विराटनगर__ कोशी प्रदेशका प्रमुख पर्शुराम खापुङले मुख्यमन्त्री दाबी गर्न दिएको समय आज सकिँदै छ । प्रदेश प्रमुख खापुङले संविधानको धारा १६८ को २ अनुसार मुख्यमन्त्री दाबी गर्न प्रदेशसभामा प्रतिनिधित्व गर्ने राजनीतिक दलहरूलाई आह्वान गरेको समय साँझ ५ बजे सकिन लागेको हो । प्रदेश प्रमुखले दिएको समयसीमा सकिन केही घण्टा बाँकी रहे पनि अहिलेसम्म नयाँ मुख्यमन्त्रीका उम्मेदवारको टुंगो लागिसकेको छैन ।
सत्ता गठबन्धनमा रहेका राजनीतिक दलले राष्ट्रिय प्रजातन्त्र पार्टी (राप्रपा) लाई साथमा लिएर मुख्यमन्त्रीसहित कोशी प्रदेशमा सरकार गठनको प्रयास जारी राखेको छ । एमालेले पनि राप्रपालाई नै विश्वासमा लिएर संविधानको धारा १६८ को ३ अनुसार प्रदेशसभाको ठूलो दलको हैसियतमा सरकारको नेतृत्व गर्ने तयारी गरेको छ ।राप्रपाको समर्थन पाउने विश्वासिलो आधार नपाएपछि सत्ता गठबन्धनमा रहेका दलहरूले सभामुख बाबुराम गौतमलाई राजीनामा गरेर भए पनि मुख्यमन्त्री दाबी गर्ने तयारी गरेका छन् ।
तर, गौतमले सभामुखबाट राजीनामा गरेपछि आफैं मुख्यमन्त्री हुनुपर्ने अडान राख्दा सहमति जुट्न सकेको छैन । दलहरूले साँझ ५ बजेसम्म मुख्यमन्त्री दाबी गर्न कोशी प्रदेशमा मात्र होइन काठमाडौंमा पनि छलफललाई तीव्र बनाएका छन् । कोशी प्रदेशसभामा एमाले ४० कांग्रेस २९, माओवादी केन्द्र सभामुखसहित १३, राप्रपा ६ नेकपा एकीकृत समाजवादी (नेकपा एस) ४ र जनता समाजवादी पार्टी (जसपा) एक गरी ९३ सदस्य छन् ।
सरकार गठनका लागि बहुमत पुर्याउन ४७ सांसदको समर्थन आवश्यक पर्छ । सभामुखसहित गठबन्धनमा ४७ सांसद छन् । सर्वोच्च अदालतले उद्धव थापा नेतृत्वमा असर २१ गते गठन भएको कोशी प्रदेश सरकार बदर गरिदिएको छ । न्यायाधीशहरू ईश्वरप्रसाद खतिवडा, आनन्दमोहन भट्टराई र तिलप्रसाद श्रेष्ठको पूर्ण इजलासले थापा नेतृत्व सरकार बदर गर्दै साताभित्र पुनः बहुमतको सरकार गठन प्रक्रियाअघि बढाउन परमादेश जारी गरेको थियो ।
यहाँ कमेन्ट गर्नुहोस्
