माघ २८ काठमाडौं____ कोरोना महामारीका कारण प्रदर्शन स्थगित भएको बलिउड फिल्म ‘पृथ्वीराज’को नयाँ प्रदर्शन मिति घोषणा भएको छ। बलिउड अभिनेता अक्षय कुमार र मानुषी छिल्लर मुख्य भूमिकामा रहेको फिल्म आगामी जुन १० मा प्रदर्शन हुने मिति निर्माणपक्षले सार्वजनिक गरेको छ। ऐतिहासिक कथामा आधारित रहेको फिल्म ‘पृथ्वीराज’ यसअघि जनवरी २१ मा प्रदर्शन हुने घोषणा भएको थियो।
तर, भारतमा निरन्तर बढ्दो कोरोना महामारीका कारण फिल्मको प्रदर्शन स्थगित गरिएको थियो। निर्माणपक्षले आगामी प्रदर्शन मितिबारे केही जानकारी नदिइ त्यतिबेला फिल्मको प्रदर्शन रोकेको थियो। अहिले भने फिल्मको ‘मोसन पोष्टर’ सार्वजनिक गर्दै फिल्मको नयाँ प्रदर्शन मिति घोषणा गरेको छ। ‘यशराज फिल्मस्’को ब्यानरमा बनेको यो फिल्ममा भारतका ऐतिहासिक पात्र पृथ्वीराज चौहानको नायकत्वलाई प्रस्तुत गरिएको छ।
फिल्मलाई आदित्य चोपडाले निर्माण गरेका छन्। फिल्म चन्द्र बारदाइको कविता संग्रह ‘पृथ्वीराज राशो’मा आधारित रहेर बनेको छ। फिल्ममा १२औं शताब्दीका राजा रहेका पृथ्वीराजको जीवनको नायकत्वलाई प्रस्तुत गरिएको छ।फिल्ममा अक्षय र मानुषीसँगै सोनु सुद र सञ्जय दत्त पनि मुख्य भूमिकामा छन्। फिल्मको लेखन तथा निर्देशन चन्द्रप्रकाश द्विवेदीले गरेका छन्।
यहाँ कमेन्ट गर्नुहोस्
