मंसिर ९ काठमाडौं____ बलिउड सिनेमा निर्माण कम्पनी धर्मा प्रोडक्सन नेपालमा चलचित्र छायांकनका लागि आउँदै छ । केही समय पछि धर्मा प्रोडक्सन आफ्नो चलचित्र छायांकनका लागि नेपाल आउन लागेको हो । यो चलचित्रले पनि नेपालमा केही समय अगाडि छायांकन भएको ‘उचाई’ले झैं मोटो रकम नेपालमा खर्च गर्ने अपेक्षा गरिएको छ । ‘उचाई’ले नेपालमा १६ करोड रुपैयाँ खर्च गरेको थियो ।
‘उचाई’को नेपाल छायांकनको ब्यबस्थापन गरेको थ्रि ह्विलर्सले नै धर्मा प्रोडक्सनको नेपाल छायांकनको चाँजापाँजो मिलाउँदै छ । धर्मा प्रोडक्सन नेपाली चलचित्र ‘प्रेम गीत–३’को लोकेशन हेरेर छायांकनका लागि नेपाल आउन लागेको सन्तोष सेनले दाबी गरेका छन् । “हामीले हाम्रो चलचित्र मुम्बईको जुन स्टुडियोमा हिन्दी डविङ गरिरहेका थियौं ।
धर्मा प्रोडक्सनको अफिस त्यही बिल्डिङको माथिल्लो तलामा थियो,” प्रेम गीत–३ का निर्देशक तथा निर्मातासमेत रहेका सन्तोष भन्छन्, “हामीले डबिङ गर्दा र एडिटिङ गर्दा सिन देखेर धर्मा प्रोडक्सनले नेपालमा फिल्मको छायांकन गर्ने निर्णय गरेको हो ।”
प्रेम गीत–३ को अधिकांश छायांकन मुस्ताङमा गरिएको छ । मुस्ताङको मनमोहक दृश्यले धर्मा प्रोडक्सनलाई लोभ्याएको सन्तोषको दाबी छ । प्रेम गीत–३ भारतमा रिलिजका लागि भनेर हिन्दी भाषामा पनि डबिङ गरिएको छ । ‘संघारक’को नाममा भारतमा प्रेम गीत–३ ओटीटी र हलमा रिलिज हुने सन्तोष सेनले बताउँदै आएका छन् ।
यहाँ कमेन्ट गर्नुहोस्
